আমাৰ জাতীয় পতাকা

                                                            -নবকান্ত বৰুৱা

তিনি বৰণীয়া        জাতীয় পতাকা

নীল আকাশত নাচে,

ওপৰে গেৰুৱা       মাজত শুকুলা

তলত শ্যামল আছে।

বগাৰ মাজত        অশোক চক্ৰৰ

চিত্ৰ জিলিকি ৰয়,

আমাৰ জাতীয়       পতাকাখনিৰ

কদাপি নহয় ক্ষয়। 

=====================

মাহবোৰৰ গীত

মাহবোৰৰ গীত

                                                                       

                                                                  -নবকান্ত বৰুৱা

বহাগ  মাহত গছৰ ডালত ফুলে কপৌ ফুল,

জেঠমহীয়া ৰ’দৰ তাপত শৰীৰ বিয়াকুল।

আহাৰ মাহত বাৰীত পকে আম, কঁঠাল, জাম,

শাওনমহীয়া বৰষুণত সাধু শুনাই কাম।

ভাদ মাহত মহাপুৰুষ দুয়োজনাৰ তিথি,

আহিন মাহত দুবৰি বন হিমত থাকে তিতি।

কাতি মাহত আকাশবন্তি লগায় শাৰী শাৰী,

আঘোণ মাহত সোণালী ধান থাকে পথাৰ ভৰি।

পুহমহীয়া জাৰত কঁপি নিহালিখন লওঁ,

মাঘ যে আমাৰ ভোগালী মাহ বিহুৰ পিঠা খাওঁ।

ফাগুন আহে পলাশ ফুলে পছোৱা বতাহ বয়,

চ’তৰ শেষত নতুন বছৰ আদৰি ল’বৰ হয়।

====================

কাৰ কি মাত

 

                                                                             - নবকান্ত বৰুৱা

বাঘ সিংহই গোজৰ মাৰে
পাৰই দিয়ে ৰুণ,
ভোমোৰা আৰু মৌ মাখিয়ে
কৰে গুণ গুণ।

শিয়ালে কৰে হোৱা হোৱা
কুকুৰবোৰে ভুকে,
মেকুৰীয়ে মিউ মিউকৈ
ফুৰে চুকে চুকে।

ছাগলীবোৰে বেবাই ফুৰে
গৰুৱে হেম্বেলিয়ায়,
কাউৰীবোৰে গছৰ আগত
থাকে ৰমলিয়াই।

চিৰিক চিৰিক কৰি মাতে
ঘৰ চিৰিকা জাকে,
সোণ মইনাই কি কৰেনো
কলকলাই থাকে।

===================